အမှတ်တရ ကဗျာ ကဏ္ဍ၊ မောင်ဒီ



ဒီကနေ့ ဗမာကဗျာရဲ့အရွေ့ဟာ သိသာထင်ရှားစ ပြုနေပြီလို့ ပြောရမှာဖြစ်ပါတယ်။
ထွေပြားလှတဲ့ ရေးဟန်တွေ ဆန်းသစ်တဲ့ တင်ပြပုံတွေကြားထဲမှာ  ရိုးစင်းတဲ့ အဖွဲ့အနွဲ့နဲ့
ကဗျာဓါတ်ပါးပါးလေး အသုံးပြုပြီး အထပ်ထပ်ဖတ်လေအရသာရှိလေ ကဗျာမျိုး ရေးဖွဲ့တတ်
တဲ့ မော်ဒန်ခေတ်ဦးကဗျာဆရာ တစ်ယောက်ဖြစ်တဲ့ပန်းချီမောင်ဒီရဲ့ကဗျာတစ်ပုဒ်ကို ဖော်ပြ
လိုက်ပါတယ်။ ၁၉၇၀ များကာလတွေကတည်းက ကဗျာတွေ မဂ္ဂဇင်းအချို့မှာ ဖြတ်သန်းခဲ့ဖူး
ပေမယ့် ပန်းချီနဲ့သာ လူပိုသိတဲ့ ပန်းချီမောင်ဒီရဲ့ အရည်အတွက်နည်းပါးလှတဲ့ ကဗျာတွေထဲ
ကတပုဒ် ဖြစ်ပါတယ်။ ပုံနှိပ်ဖော်ပြခဲ့တဲ့ မဂ္ဂဇင်းအမည်ကို မဖော်ပြနိုင်တာကတော့ ဘီပီအက်ဖ်
ရဲ့အားနည်းချက်ပဲ ဖြစ်ပါတယ်။

Burmesepoetryfoundation အယ်ဒီတာအဖွဲ့




ငါ့ဘ၀ရဲ့အရသာ

ငါ ငယ်ငယ်က
ည ဘက်မှာ
လက်ဝါးတံဆိပ်
အင်္ဂလိပ်လက်ကျန်
လက်ဆွဲမှန်အိမ်နဲ့
စာကြည့်ခဲ့ရတာ။

နေ့စဉ်ပါပဲ
မည်းချိပ်နေတဲ့
မီးအိမ်မှန်ပြောင်းမှ
မှိုင်းအထပ်ထပ်ကို
ဆပ်ပြာနဲ့ ဆေးကြောခဲ့ရတာ။

နေရောင်ခြည်မှာ
ကြည်လင်နေတာ
ငါ့ဘ၀ရဲ့ အရသာ။   

မောင်ဒီ


1 comment:

  1. မှန်အိမ်လေးကလည်း အလင်း အမှောင်ကို ခွဲခြားပြီးလောကလူသားတွေကို သတိပေးနေတတ်တာ ...

    ReplyDelete