ကဗျာ

ငါ့ထက်မြက်မှုက သူ့အံသွားပေါ်ရောက်နေတယ်
အသွေးအသားတွေဖြန်းဖြန်း ခမ်းခြောက်သွားအောင်
ငါ့ စာကြည့်စားပွဲက စန္ဒယားတစ်လုံးလို အသံထွက်နေတယ်
ရေညှိပင်ရဲ့အမြစ် ကျောက်သားထဲ ထိုးခွဲဝင်သွားပုံ
လဲမှို့ကလေးလေထုကို ခွမ်းကနဲ ခွဲထွက်မြောက်တက်သွားပုံ
ငါ့မွေးညှင်းတွေထဲ အိမ်ဆောက်ပစ္စည်းတွေ
တဒိုင်းဒိုင်း ထုနှက်ရိုက်ခတ်နေပုံ
ရေတွင်းကလေးဟာ ဘီးပေါက်ပြီး
ချောက်ကမ်းပါးရဲ့ အစွန်အဖျားမှာ သွားတင်နေတယ်
ပြတင်းပေါက်တွေကို အကုန်လွှင့်ပစ်လိုက်ပြီး ငါလှမ်းခေါ်တယ်
ညနေခင်းထဲက ထိုးကလော်ထုတ်လိုက်တဲ့ လေညင်း
အကျော်ကြားဆုံးသတင်းဟာ အမှိုက်ခြင်းထဲမှာ
ငါက လေချွန်သံထိပ်ဖျားမှာ
မီးခြစ်ဆံ အကျွမ်းတစ်ချောင်းနဲ့
စီးကရက်ဘူးခွံပေါ်
'မာယာကော့ဖ်စကီး' လို ၀ါကျတစ်ကြောင်း ရေးခြစ်ချင်မိ..

မောင်ဖီလာ
ဂေါ်ဂင်ရဲ့သစ်သီးကို အရည်ရွှမ်းအောင်ရေးနည်း ကဗျာစာအုပ်မှ-

No comments:

Post a Comment